學：學生 記：記者 答：范徐麗泰
學：應否平反六四？
答：六四係一件不幸嘅事，亦係發生過嘅事，所以毋須掩蓋。YouTube有片段話當日天安門並無任何事發生……所以成件事到底係點，我好老實講，我唔知到底發生咩事。至於平反六四，我實在無權去話應否平反六四。
學：點睇李克強嚟香港時，有着六四Tee嘅示威者被抬走？
答：李克強嚟香港，講得市井啲，佢係嚟香港送禮，係客人，我哋要有待客之道。我哋係主人，喺某啲議題上唔可以去得太盡……我唔可以保證佢唔會畀人衝擊，所以要有措施，啲措施過頭與否就要公論。
學：鄧小平應唔應該攞諾貝爾和平獎？
答：對和平獎沒有感覺……你有權畀任何人。我覺得鄧小平唔應該攞，佢有咩理由要攞？
記：唐英年是否已經唔係你心目中嘅人選？
答：其實我由頭到尾都講唐英年先生係可接受嘅人選，我無講過唐英年先生係理想嘅人選，我亦無講過唐英年係我心儀嘅人選。……我本來話支持佢，但從我收到嘅電郵入面，好多市民都有唔同嘅意見，我覺得市民嘅意見，我唔能夠唔理會……我希望唐英年先生喺將來幾個月內，佢嘅表現可以得到更多人嘅支持。
記：唐英年連修身齊家都做唔到，你點解仲覺得佢有治國嘅才能？
答：（微笑停頓約五秒）我真係答唔到你，因為我（吞吞吐吐）……我當時……同佢講會支持佢嘅時候，根本唔知佢有呢啲嘢（婚外情），依家唔會再講。（記：有冇後悔？）我要履行我應承咗嘅嘢，做政治人物應承咗就要做。