考考大家，知唔知辛亥革命係邊年邊月邊一日？如果你唔知答案係一九一一年十月十日，唔使驚，唔使怕。功夫茶唔會話你弱智低能甚至數典忘祖，反而覺得閣下係可造之才，有資格躋身官場。事關官僚文化愈來愈不可理喻，最適合騎呢一族投身公務員大家庭。
官僚文化最不可理喻嘅係，民望低過肉彈低胸裝嘅林瑞麟，居然可以步步高升，取代辭職考慮選特首嘅唐英年，出任一人之下、萬人之上嘅政務司司長。
你知啦，林公公冇乜貢獻，唯一功能係重重複複飾演一部「人肉錄音機」，委以重任確實令人費解。既然官僚文化變得咁庸才當道，唔知辛亥革命正確日期嘅傻仔真係有資格做官o架。
如果大家仍然唔信傻仔有資格做官，咁就等功夫茶講多一單實例。辛亥革命發源地之一嘅中環百子里公園下個月即將完工，雖然趕唔切喺十月十日之前開幕，不過點都叫做有意義。之不過問題係，呢個公園一錯再錯。
首先，革命先烈楊衢雲創辦輔仁文社，序言係「一曰扶危濟貧……二曰勸善規過……三曰切磋琢磨……以為此社名曰輔仁文社」。哈，斥資四千萬搞活化嘅市建局認真唔化，居然喺刻有序言嘅亭架上面，將「曰」字全部刻做「日」字，簡直貽笑大方。
其次咯喎，呢個錯得最離晒大譜，政府聯同中西區議會負責修葺嘅楊衢雲被暗殺地點紀念碑，輔仁文社竟然變成「輛仁文社」。古有馮京作馬涼，今有輔仁作輛仁，你話嘞，盲字唔識得幾個嘅傻仔係咪都有資格做官？
楊衢雲紀念活動籌委會主席楊丕漢講得啱，香港作為辛亥革命發源地，短短一條結志街之嘛，兩個紀念革命嘅地方都出現錯字，實在過分得令人無法接受。
即係咁，家陣嘅官僚文化實在太騎呢嘞，正常人肯定一頭霧水，有必要從一個反智嘅角度入手先至可以理解。如果你真係一個冇乜常識而又胸懷大志嘅傻仔，投身官場之後大可從寫錯字開始，寫下寫下，錯下錯下，你自然就會升官，因為官場升遷完全同表現無關。當你官位逐漸愈升愈高，你嘅民望必定愈來愈低，咁就恭喜你嘞，你大有可能學似林瑞麟咁樣位極人臣！
所以咯喎，負責百子里公園紀念辛亥革命嘅一眾官僚，寫錯字冇乜嘢大不了，愧對先烈亦唔係問題，最重要嘅係官官相衞。一眾官僚只要封林公公做偶像，官運亨通指日可待啦，傻仔！