facebook（fb）上面你留言畀我、我留言畀你屬等閒事，你like我、我like你亦好自然。不過尋日馮驊話，如果候選人留言或者like佢哋嘅粉絲，就要交番個書面文本畀選管會，至於粉絲留言或者like候選人就唔使。
另一方面，馮驊話候選人應該提醒佢哋嘅粉絲，如果粉絲們like或者留言畀候選人，等於書面同意候選人將呢啲like或者留言公諸於世。
社民連候選人阿牛曾健成聽到火都嚟埋，佢喪鬧fb本來就係用嚟同人溝通，搞到留言講句多謝都要上報，認真麻煩，阿牛仲反問馮驊，如果你返工同放工都要上報一次，你覺得煩唔煩呀？此言一出，唔理乜黨乜派，全場即時掌聲雷動。阿牛嘅對手包括獨立候選人李進秋同埋雷倩兒。