政情：劉江華落區身不由己？
區議會選舉提名期最後一刻決定復出參選嘅民建聯副主席劉江華尋日話，參選只因原本已喺沙田田心區報名參選嘅潘國山讀咗七年博士學位，今年一定要交博士論文，否則畢唔到業，所以出手相助。劉江華又自爆特別明白潘國山處境，因為自己都有類似嘅經歷。
劉江華話，回歸嗰年，佢都報咗中大讀社會學博士，仲係搵當時係中大社會學系主任嘅劉兆佳同中大前校長金耀基做導師，但因為要兼顧議會工作，最後頂唔順放棄讀書，做唔成博士。不過依家劉江華貴為行政會議成員，佳叔就係中策組首席顧問，可能劉江華當年無拜佳叔為師，都唔係錯嘅決定呢。
咁點解係由劉江華「替補」而唔係其他人？劉江華就話，係潘國山已經搵過晒所有人，但都唔及佢適合至搵佢。至於佢做咗區議員之後會唔會角逐超級區議會議席，佢就話選咗至算喎。同區參選仲有無黨派嘅孫燦培。