政情：媽打監製節目贈婦協
前民政局常秘李麗娟（媽打）退咗休幾年，就做足幾年慈善籌款工作。身為婦協顧問嘅媽打，尋日現身婦協嘅一個活動時，仲話自己明年會「轉行」做電台節目監製，佢打算喺節目裏面，訪問一班對香港有貢獻嘅婦女。
媽打話，趁住後年係婦協成立二十周年，自己想送份禮物畀婦協，所以籌備緊一個叫做「Women Trailblazers」嘅訪問節目。媽打話，自己將會出任節目監製，訪問人選初步都有決定，好似粵劇名伶白雪仙、奧運金牌得主李麗珊等，當然唔少得畢生傾力於推廣家庭計劃嘅首任家計會總幹事、現任婦協主席林貝聿嘉。
佢話，當年自己生咗大女同細仔之後，本來想追多兩個，當時四歲嘅囝囝可能唔想有弟妹分薄對自己嘅愛，就同媽咪講：「乜你冇聽過『兩個就夠晒數』咩？」就係因為呢隻歌仔，佢嘅一生因而改寫。林貝聿嘉對佢咁重要，所以一定要訪問佢。