擺明車馬要喺十一月區議會選舉狙擊民主黨、要佢哋票債票償嘅人民力量，近日不斷被報紙攻擊，話佢哋不顧昔日情誼，派人狙擊公民黨嘅候選人。為免外間對佢哋愈描愈黑，人民力量專登開咗個記者會，話要澄清外間對佢哋競選策略所發表嘅謬論。
人民力量立法會議員黃毓民點名批評《蘋果》同《明報》為咗打擊人民力量，呢幾日不斷歪曲事實，唔講道理，鬧佢哋專登狙擊公民黨。
毓民話自己大大話話喺尖沙咀區經營多年，儲落一定地區勢力，公民黨乜地區工作都無做過但照參選都算啦，依家仲要掉返轉頭話人民力量同佢哋搶區，自己條氣就點都唔順㗎嘞。毓民愈講愈激動，仲話公民黨只係大狀，唔係黑社會，尖沙咀並唔係佢哋地頭嚟㗎。
另一個指控就係話人民力量因為要喺今次選舉狙擊民主黨，所以搞到建制派好多候選人可以自動當選。毓民即刻澄清指控，話建制派自動當選同人民力量無關，仲做晒統計咁話因為泛民今屆縮沙，撤出至少三十個上屆同建制派對壘嘅選區，先搞到民建聯不戰而勝喎。