政情：林D9做騷西九冇運行
香港文化界等咗十幾年，卒之等到西九文化區得以落實。點知日前傳嚟噩耗，殺咗位有「人肉錄音機」之稱嘅林瑞麟林D9出嚟做西九董事局主席，睇嚟西九真係無運行，由冇文化嘅人搞文化，後果可想而知。尋日林D9第一日返工，就做晒騷落區睇西九圖則，但好衰唔衰，佢要等人哋收咗工先去睇，阻人收工真係罪大惡極。
指手畫腳 裝模作樣
西九管理局喺九龍公園設壇，展覽經修訂嘅西九發展圖則，尋日首天上班嘅林D9，成日流流長都唔肯落區睇，硬係要等到個展覽喺傍晚六點結束後，六點十分佢至到場參觀。佢仲拉埋西九行政總裁連納智陪佢落去，佢一邊睇、一邊指手畫腳，裝作一款好熟西九嘅模樣。
睇咗一輪之後，林D9就撻着佢部錄音機話，西九各同事以及前董事局主席唐英年已經為西九打下基礎，佢會繼續努力推動諸如此類嘅字句。一問起佢有關本地樂團遭受歧視一事，佢就原形畢露，播帶話會繼續關心、繼續留意，情況同佢處理替補機制嘅時候一模一樣，真係聽到人毛骨悚然。
記者再追問林D9本地樂團件事，佢就變本加厲話，發展西九嘅目的係希望本地藝術人才同埋國際藝術人士，可以「共同為我哋建構香港作為亞洲國際都會一個新品牌」。呢種咁嘅chok到行回應，怕且喺官場之內林D9認咗第二，都冇人咁認第一。
林D9素來都唔會迴避記者提問，之但係佢能夠將一啲空泛、乏味同重複嘅說話，調亂次序、改變形容詞重新講一次，因此換嚟「人肉錄音機」呢個外號，而正正係因為錄音機代表住無文化，由一位無文化嘅人掌西九，西九仲點會有將來呢？難怪有啲西九中人，私下都對林D9當上董事局主席搖頭嘆息，我哋都可以一齊為西九呢塊本來係文化界沃土嘅地方，如今變成荒土默哀。