《爽報》拖累《蘋果》跌 《東方》《太陽》齊齊升

呢嗱，爛果報江河日下並唔係空口講白話o架，完全有數得計。先講銷量吖，爛果報自稱嘅印數已經少咗一萬幾，而根據報販實牙實齒嘅親身經歷顯示，實際銷量暴跌三成至真。換言之，自從《爽報》出街以來，爛果報每日跌紙六、七萬份，簡直係跌到阿媽都唔認得！

除咗銷量暴跌之外，爛果報廣告收益同樣極速萎縮。不如咁啦，簡單少少，淨係用《東方日報》同《太陽報》做一個比較。人稱「五毒喪報」嘅《爽報》獻世之前五日，《東方》比爛果報嘅廣告量多出三百一十二條《爽報》亂世之後五日，《東方》廣告量就比爛果報多七百八十六點五條，即係增長咗四百七十四點五條。廣告量嘅單位點解叫做「條」？呢個係行內術語，一個版面可以分割成十八條，換句說話嚟講，四百七十四點五條即係超過二十六版！

嗱嗱嗱，問你服未？《東方》廣告量拾級而上，爛果報就滾水淥豬腸，此消彼長之下證明《爽報》係一個佗衰家。喂，唔好唔記得，《爽報》內容全靠爛果報餵奶o架，咁累死自己個大奶媽，真係冇陰功！

至於同《太陽報》比較又點呢？本來，爛果報嘅廣告量係多啲嘅，不過家陣情況逆轉，《太陽報》廣告量多過爛果報四十四點五條，前後增長一百七十一條，即係接近十版。事實再一次證明，《爽報》拖累自己友。淫賤黎就好比一個超級無敵大傻瓜，戇居居搬起石頭掟自己對腳，掟到喪咗。

有人可能會話，《爽報》冇理由只係搶到爛果報生意，而搶唔到其他報紙喎。道理其實好簡單，讀者攞得《爽報》就唔會買《蘋果》，廣告商梗係唔會兩份報紙都落廣告啦。

正如廣告商話齋，《東方日報》及《太陽報》反應快，除咗減價回饋讀者，而且改版應戰，內容充實咗，銷量增加咗，廣告商自然識得選擇，估計兩報近日廣告量增長超過一成。講到呢度，功夫茶有必要向各位讀者同廣告客戶講一聲感激，感激大家慧眼識英雄，知道《東方日報》同《太陽報》始終係業界翹楚，質量同銷量都係信心保證。更上一層樓嘅就係，自從兩報減價回饋讀者以來，每日銷量總共增加六、七萬份，實在有賴大家鼎力支持，多謝多謝！

總之家陣嘅情況就係咁，《爽報》拖累《蘋果》跌，《東方》《太陽》齊齊升。講到底，淫賤黎鹹鹹濕濕，點可能爽吖，應該改名叫《濕報》就真！