政情：陳健碩退休心願未了
喺土木工程拓展署服務咗三十四年嘅土力工程處處長陳健碩，下星期二開始退休前休假，尋日佢帶埋接班人副處長陳潤祥出嚟見傳媒。陳健碩話，雖然咁多年都做得好開心，但亦帶畀佢唔少壓力，尤其係每逢打風落雨就最頭痛，「天文台就估有幾大雨，我就估啲斜坡有幾大機會冧！」
陳健碩話，咁多年印象最深刻係○八年嘅雨災，當時造成北大嶼山超級山泥傾瀉，以及九四年觀龍樓冧護土牆事件，造成唔少傷亡，所以政府加大力度去修葺天然斜坡及保養舊有護土牆，總算做番件好事。
不過，做咗差唔多十三年處長嘅佢都有心願未了，就係未能爭取喺香港開設更多石礦場，每年要喺內地購買成千噸石礦，對環境有好大影響，佢期望喺近蒲台島嘅螺洲開設石礦場。身兼香港工程師學會嘅陳健碩，退休後打算全職做學會工作，「希望下年選高級副會長，後年選會長。」