政情：CY被高呼候任特首
近期行政會議開會特別受關注，事關有兩個疑似特首候選人喺度開會，請願人士都多啲，話唔定提出嘅訴求會受到重視。近期為中港家庭孕婦發聲嘅中港家庭權益會，尋日就率領三十個內地孕婦操去行會示威，一見疑似候選人行政會議召集人梁振英（CY）到場，即高叫「候任特首、主持公道」。CY面帶笑容接收請願信，表現得相當受落，但就冇任何回應。
相反，示威人士見到另一疑似候選人政務司司長唐英年時，就叫「特首爭櫈仔、中港家庭冇床位」，明顯寸爆唐唐掛住選特首唔做嘢。
點解口號都要分兩套？梗係啦，CY之前喺網誌度話，政府應該優先照顧丈夫係香港人嘅內地孕婦需要，難怪啲中港家庭咁支持佢，仲叫佢做候任特首喇！
CY離開行會前話，依家手頭上嘅工作進度良好，應該會喺幾日內正式辭退行會召集人職務，至於「幾日內」即係幾時，CY都係答嗰句：「具體日子需視乎工作進度而定。」