政情：怒火鄉紳炮製煲呔曾

夕陽政府最近與鄉紳對着幹，申訴專員早喺年初就挑起新界僭建風暴，辣㷫鄉民包圍立法會，最近政府又決定將五十四幅毗連郊野公園嘅土地納入分區規劃大綱圖，既沒有向鄉紳作出賠償又剝奪佢哋嘅發展權，更甚係影響僑居海外嘅原居民「有村歸不得」，落葉歸根嘅夢更加係遙遙無期，認為同海盜強搶私人土地無分別，即時惹來不少鄉紳嘅強烈反彈。

據聞有鄉紳打算同夕陽政府算帳，計劃喺下月村代表大會上發起抗爭前，率先喺明日鄉議局就職典禮上打響頭炮，直接向出席嘅主禮嘉賓煲呔曾「贈興」，向其送出「永遠懷念你」牌匾，寓意煲呔曾對新界人唔好，夕陽政府又不時對愛國愛港人士挑起事端，叫佢早走早着。

林鄭聞風「借尿遁」

至於發展局局長林鄭月娥係鄉紳嘅次號目標。據聞有鄉紳打算明日向林鄭斟茶，多謝林鄭過去大半年對新界人嘅「關愛」，明眼人一睇就知係講反話想落林鄭面。可能林鄭一早收到風兼聞到火藥味，尋日政府就出新聞稿話林鄭會喺本月二十九日至下月二日到意大利出席城市規劃會議，意味佢未必能夠出席到鄉議局就職典禮，連「好打得」嘅林鄭都要落荒而逃，呢個政府真係顏面何存。

雖然一眾鄉紳向夕陽政府「玩鋪勁」嘅計劃有晒雛形，但據聞一切仍有待主席劉皇發批准先成事。不過，話時話，涉及新界人傳統權益嘅嘢茲事體大，如果發叔最後決定叫停鄉紳呢類咁溫和表達訴求嘅行動，難保滿腔怒火嘅鄉紳表達訴求只會愈來愈激，到時發叔真係好心做壞事，愛夕陽政府隨時變成害政府喇。