中環出更：朱楚珠畫展 好友齊撐場
抽象水墨油彩畫家朱楚珠（Nancy）喺藝術中心搞咗個「彩．墨．朱楚珠」畫展，好多名人撐場。藝術中心監督團主席、已故船王包玉剛三女包陪麗（Cissy）好夠義氣，為咗Nancy呢個相識多年嘅好朋友，特登喺日本趕返香港。Cissy喺畫廊滿場飛招呼老友，一時錫面頰，一時嚟個擁抱，果然好人緣。
Nancy話畀卓妮知，佢嘅抽象畫作係用水墨底加上油彩畫成，仲特登由瑞士引入顏料，令到畫作嘅顏色佻脫啲。今次畫展五十三幅畫中，佢自己最鍾意「水族館」同「江南梯田」兩幅，覺得好有意境。
黃宜弘唐裝搶鏡
立法會議員黃宜弘同梁劉柔芬都嚟捧老友場，黃宜弘着住套白色衫金色袖唐裝，原來係太太幫佢返大陸造嘅。卓妮仲撞到前領匯主席鄭明訓。佢同卓妮講自己下個月會出新書，不過講到內容，就只肯透露係講中美關係，賣個關子畀讀者。
卓妮