中環出更：黃傑龍 陳詠梅請小朋友開餐
港人生活富庶，但對於低收入家庭小孩，吃一頓豐富晚餐，還是遙不可及。叙福樓集團執董黃傑龍（Simon）早前就自掏腰包，宴請一百位來自元朗及深水埗嘅低收入家庭小朋友，到旗下九龍灣MegaBox御苑皇宴食晚飯，仲大玩遊戲兼送禮物，全程由香港提升快樂指數基金義務總幹事陳詠梅（Helen）義助幫手。
商場尋寶送文具
當晚卓妮都有到場湊熱鬧，一見張餐單，全部都係健康食品，包括大蝦沙律、薯仔蓉湯等，原來餐單係營養師建議，全部少油少鹽，炸雞髀就免問嘞，保證健康。香港車費貴，呢班小朋友幾乎未去過MegaBox，Helen同Simon諗咗個尋寶遊戲，叫小朋友喺商場跑上跑落，認識新地方，得獎者有大袋文具送，開心到唔捨得走。
睇見小朋友玩得咁High，Simon有感而發話，開心其實好簡單，不論大人或細路，最緊要知足常樂，學會感恩。講番基金會，十月底會請來猛人「開壇」分享，包括前商務及經濟發展局常秘蔡瑩璧及房屋協會主席楊家聲，分享如何喺工作中找到快樂，兩人分別喺政商界有豐富經驗，大家咪錯過喇。
卓妮