「阿媽阿媽，你仲認唔認得我呀？」
「你係邊個？做乜認親認戚叫我做阿媽？」
「唉，原來我真係做咗『金翅仆街鳥』，阿媽果然唔認得我！」
功夫茶之所以有感而發講古仔，查實係咁嘅，自從淫賤黎推出鹹濕到冇人有嘅《爽報》之後，同一集團嘅《蘋果日報》銷量應聲急挫。你知啦，「阿媽都唔認得」係坊間流行嘅百搭形容詞，用嚟形容跌紙就係「跌到阿媽都唔認得」。所以功夫茶就懷疑嘞，如果爛果報仝人返到屋企訪問自己阿媽：「你仲認唔認得我呀？」令壽堂好大可能以為白撞。
《爽報》雖然鹹濕，一出街即淪為過街老鼠，被形容為「五毒喪報」，之不過咁，唔介意被荼毒嘅始終大有人在。所以咯喎，鬼打鬼之下爛果報銷量萎縮絕對唔係意外。如果你問，萎縮成點呢？功夫茶不妨為大家提供幾個數字。
九月十八日賽馬日，《爽報》尚未獻世，爛果報自稱發行量三十二萬份。九月二十五日同樣係賽馬日，《爽報》已經亂世，爛果報自稱發行量三十萬八千份。淨係計牌面，爛果報銷量已經急跌一萬二千份。不過如果你去訪問報販，佢哋會話過你知，賣剩蔗多到嚇死人。業內人士推測，爛果報真正銷量跌咗三成，實銷數字不足二十五萬份。如果你進一步訪問報販，佢哋更加會同你講，好彩《東方日報》同《太陽報》減價回饋讀者，銷量急升咋，咁先至可以補番條數，救回一命！
既然爛果報跌紙跌到阿媽都唔認得，咁就印證咗一件事，淫賤黎陷入雙輸殘局，免費嘅派唔去，收費嘅賣唔出，變咗一隻隨時瓜得嘅「金翅爽死鳥」！
話時話，《爽報》點解被形容為「五毒喪報」？原來喎，民間團體浩浩蕩蕩操去壹淫媒示威抗議，譴責《爽報》嘅罪行包括：毒害青年、毒害社會、毒害家庭、毒害學校以及毒害新聞。
計功夫茶話齋，其實呢一份係唔止五毒嘅「劇毒喪報」，事關罪行仲有兩項：毒害《蘋果》，毒害老闆。喂，你估淫賤黎唔係自取其辱嘅受害者咩？旗下刊物銷量暴跌不在話下，名譽破產呢家嘢更加係傾家蕩產都買唔番！
哈，功夫茶忽然之間諗起《壹本便利》，當時呢一份同樣係人人喊打嘅鹹濕雜誌，不敵群眾壓力而執笠。累人累己累街坊嘅《爽報》會唔會又係執笠收場？望係咁望啦，唔好再荼毒人心吖嘛，而且不排除最想佢消失嘅街坊係爛果報中人，鬼叫《爽報》害到自己友嘅銷量跌到咁殘咩！