夕陽政府主要官員唔知係咪見任期好快完，有事冇事都外訪一餐，我哋之前講過先後有七名主要官員離港外訪，最新接力嘅係民政事務局局長曾德成，五年任期就快完，佢至首度衝出亞洲，去歐洲嘅俄羅斯訪問五日。
港府尋日公布，只曾到日本、新加坡同多個內地城市外訪嘅曾德成，由尋日開始至本月二十九日訪問俄羅斯莫斯科和聖彼得堡，期間會探討吓點樣加強雙方喺文化體育方面交流合作，又會應聖彼得堡大學邀請，到該大學主持客席講學喎。
話時話，曾德成今年初申亞失敗後隱形多時，尋日忽然宣布就文化體育事宜外訪，同當地傾吓如何合作，難免令人有所疑竇，如果曾德成真係對體育議題上心嘅，就應該盡快按照申亞定出嘅時間表，落實興建各項已規劃興建或提升設備嘅地區體育設施，呢啲先係實事求是，真正惠及運動員同普羅市民。