政情：杜宇航「槍斃」唐英年？
下屆特首選舉劇情日新月異，隨着建制派元老陸續放話對建制派多於一人參選不持異議，令兩名疑似特首候選人唐英年同梁振英一同入閘參選嘅機會大大增加，但在唐梁大戰嘅前夕，唐唐出席活動時，疑似被活動布景板中嘅演員杜宇航對準「槍斃」，咁會唔會對未來嘅選戰帶來一啲啟示呢？
唐唐陣營中人於十多日前開始放風，話唐唐會喺上周辭職準備參選，不過，等了又等，唐唐仍然係猶抱琵琶半遮面未辭職「備選」，令到唐營中人心急如焚，但唐唐繼續愛理不理，尋日仲有心情出席一個電影首映禮。
本來出席電影首映嘅安全系數應該好高，好難會出現乜差池，點知唐唐先後兩次獲邀上台，佢站立嘅位置碰巧同布景板上的演員劇照重疊，又適逢照片中嘅演員又正擎槍殺敵，唐唐則低首不語，形成一幅唐唐「被槍斃」嘅趣怪畫面，但唐營中人睇到相信一定會笑唔出囉。