中環出更：鄭錦鐘入市：睇多幾日先
全球股市如火燒連環船，港股亦跌到四腳朝天。無貨在手者，蠢蠢欲動等撈底。保良局副主席鄭錦鐘（Eric）話，會吸納優質藍籌，長揸收息。
鄺美雲紅噹噹贏錢
尋日落雨濕濕，沙田馬場人潮疏落。Eric無馬出，照同太太入場為老友打氣，兩公婆手牽手，好恩愛。講起股市，佢淡定分析話，港股背靠中國，唔差得去邊。呢次大調整，係低吸良機，首選有「食力」嘅藍籌股，貪佢穩陣有息派，好過放喺銀行。咁講法，幾時撈底好？Eric賣關子話：「睇多幾日先。」等股市喘定入市都未遲。
前港姐鄺美雲（Cally）亦一身紅噹噹為團體馬「好好運」打氣。Cally貴氣十足，連鑽戒、鑽石手錶、鑽石手鏈及耳環，全身行頭至少過百萬元。呢身打扮果然召來旺氣，「好好運」喺第一場跑第三，袋逾六萬元獎金。Cally都以行動撐愛駒，落注「買少少玩吓」，贏咗幾多？佢甜笑話：「最緊要開心。」