中環出更：嫻姐行山享受大自然
傳咗足足一年，工聯會「票后」陳婉嫻日前終於報名參加嚟緊嘅區議會選舉，並展開宣傳攻勢，但縱使拉票幾忙都好，佢每星期總會抽時間行山舒展筋骨。○三年曾經患癌並戰勝病魔嘅嫻姐承認，患病前確實好少運動，痊愈後聽從醫生建議多做運動，仲體會到行山嘅樂趣，原來大自然美景可以令佢暫時忘卻工作煩惱，可謂一舉兩得。
上星期六朝嫻姐去山頂香港仔水塘道行山，嗰條路嫻姐熟晒路，佢話平時約埋幾位朋友行山有講有笑，三小時路程話咁快行完。嫻姐好感慨話，現代人生活違反規律，只有接觸花草樹木、鳥獸蟲魚，人類先至可以回歸真我喎。除咗行山外，嫻姐每星期仲會做兩次健身。
叫想選特首嘅人快啲落區
嫻姐笑言，佢細個雖然成日都通山走，但大個投入社會工作後就冇咁嘅機會喇，隔咗幾十年後再走番上山，都咪話唔得意；嫻姐班「行山腳」老友除咗令佢學識放鬆心情外，另一項貢獻就係教識佢去認唔同品種嘅樹木，好似大頭茶、台灣相思同黃牙果咁，嫻姐隨手就指咗幾種畀卓妮睇。
嫻姐經過幾年鍛煉之後，體能真係好咗唔少，見佢行咗大半個鐘頭都面不紅、氣不喘。
近排政界最hit就係講特首選舉，嫻姐提醒想選嘅人，唔該快啲落區了解居民生活情況，事關好多政策唔係坐喺度做研究就可以搞得好，只有明白用家感受，政策先會奏效：「講咗好多年啦，點解啲人硬係做唔好呢？」陳婉嫻將出選黃大仙龍上區，同區仲有林偉基同任亮憲。
卓妮