兩個疑似特首候選人政務司司長唐英年（唐唐）同行政會議成員梁振英（ＣＹ）遲遲未能辭職，撇除煲呔曾有冇為咗施政報告而喺背後阻撓嘅因素，原來擇個好日子都有利參選運勢。ＣＹ已經口頭講咗話辭職，但唐唐就仲未宣布，我哋問過香港術數家協會楊子東師傅，佢預測十月四日星期二係唐唐辭職嘅吉日。
楊師傅話，唐唐係壬辰年出生，行「水木」運，水木為用，喺農曆九月前辭職宣布參選最有利，由於十月八日「寒露」才正式踏入農曆九月，之前最好嘅吉日就係十月四日，當日正係「壬辰日」，壬屬「水」，辰亦屬「水庫」，極之有利唐唐，最適合佢宣布辭職。除咗當日外，餘下就只有九月廿六日選擇，但礙於呢日係「閉日」，日子就冇咁好喇。
點解辭職都要擇好日呢，楊師傅話，擇個吉日辭職緊要過擇日參選，事關辭去舊職代表新嘅開始，吉日辭職有利運勢喎！