政情：任亮憲頒影后獎予嫻姐
我哋上月率先報道有「維園阿哥」外號嘅人民力量任亮憲，會喺區議會選舉挑戰工聯會「票后」陳婉嫻，佢尋日終於報名參選黃大仙龍上選區。任亮憲向來寸嘴，佢尋日報名時就攞住一個類似「奧斯卡」嘅獎座，話嫻姐退出民建聯就想洗脫保皇黨色彩確係政壇影后，演技同剛奪得威尼斯影后嘅「桃姐」葉德嫻有得揮。
任亮憲否認參選係爭取曝光，又強調呢個區暫時有三人參選，全部係空降，所以講政績無從比較，換句話即係有得揮囉。雖然嫻姐對任亮憲成為大家嘅焦點，但同區嘅民主黨林偉基（阿基，圖）都唔嘢小，佢曾經喺○三年代表民協參選油尖旺佐敦選區，同當時嘅亞視台柱劉志榮對壘，最終以二百一十票之差落敗，三年前轉投白鴿黨，開始喺黃大仙區服務。
面對星級對手嫻姐，阿基聲言本來都有信心贏，但加埋任亮憲，佢話依家已經唔諗勝算，仲話就算輸咗都會繼續做地區工作咁話，似乎已經作好最壞嘅打算喎。
除咗呢區激鬥外，社民連立法會議員梁國雄（長毛）亦決定到荃灣愉景選區參選，挑戰新民黨副主席田北辰，長毛明日親身落區爭取市民提名，預料係一場精彩嘅選舉。