政情：鄉民抗爭 惡鬥發展局
申訴專員喺年初刮起新界僭建風暴，辣㷫鄉民包圍立法會，至今仍未平息。不過，一波未平一波又起，政府早前又決定將五十四幅毗連郊野公園嘅土地納入分區規劃大綱圖，結果又再激到鄉民生蝦咁跳，今次反彈比上次僭建風暴更大。有鄉民不滿鄉議局處事過分軟弱，聲言自發組織大型抗爭行動，頭炮係計劃喺十月廿二日全體村代表大會上批鬥政府，矛頭直指發展局局長林鄭月娥。
鄉議局領導層喺處理村屋僭建同土地規劃兩個問題上，一直都畀鄉民責難企得唔夠硬，有來自元朗嘅原居民早前就自行發信予林鄭，希望可以有機會同局長對話，講吓鄉民嘅心聲同實際生活情況。不過，鄉議局早前曾邀請林鄭落元朗視察保育地情況，但遭拒絕，所以肯定懶理鄉民嘅邀請，令負責寫信嘅林先生直言好失望，唔明局長點做人父母官咁話。
林先生又透露，一位同佢通電話嘅發展局職員講到明，局長只會同鄉議局溝通，仲話局長擔心落區出意外，所以唔肯入新界喎。林先生仲話，煲呔曾早幾日入元朗出席活動，如果唔係有人㩒住，佢哋一早攔途伸冤，佢認為鄉議局今次太懦弱，所以成班村民考慮自發組織行動，甚至要求所屬鄉事委員會退出鄉議局咁話。夕陽政府諸事不順，今次仲牽連鄉議局，肯定有排煩。
預留發展區 未必一定好
可能林鄭聞到陣味，尋日話發展同保育要取得平衡，即使將五十四幅地納入分區規劃大綱圖，但如果發現土地範圍內有原居民村落，亦會預留「鄉村發展區」，畀原居民申請興建丁屋喎。局長咁講，算唔算係向鄉民釋出善意呢？未必！鄉議局執委林國昌話，即使規劃後有預留「鄉村發展區」，仍然要睇個區有幾大、起到幾多丁屋，一切都要傾過、睇過先至知。
有鄉紳亦話，有關五十四幅土地本來係冇規劃嘅，理論上起乜都得，但如果批土地真係變咗郊野公園或自然保育區，將來真係唔使旨意有發展，申請亦唔會批，加上呢啲土地嘅業主未必係原居民，總之就麻煩多多，質疑政府無事搵事嚟搞，鄉民自然要群起反對。