中環出更：陳仲尼搞白煲呔慈善宴

全國青聯副主席陳仲尼（Rock）自卸任香港青聯主席後，雖然大計多多，但仍然趁住暑假空檔，同家人及父母同遊美國洛杉磯及三藩市，共享天倫。當然充電返港後又要再忙過，事關佢擔任理事會主席嘅香港青年獎勵計劃，適逢今年五十周年，佢會夥拍計劃成員之一嘅新世界主席鄭裕彤長孫鄭志剛（Adrian），齊搞慈善籌款晚宴。
陳仲尼（右三）夥拍同為全國青聯副主席嘅鄭志剛（中）搞慈善晚宴。 （資料圖片）
陳仲尼（右三）夥拍同為全國青聯副主席嘅鄭志剛（中）搞慈善晚宴。 （資料圖片）

阿Rock要破格，規定大會dress code要打白煲呔同着燕尾禮服。咪睇少一條白呔，喺西方禮服中係最高規格，隆重場合先會戴。咁大陣仗有原因嘅，事關英國愛德華王子屆時將親臨香港主禮，王子係國際總會主席，點會唔支持吖。晚宴將於十一月初舉行，唔少青聯富二代都會撐場，包括郭永亮、楊鼎立、鄭詩韻、林玉茵、羅詠詩及彭芷君等。

陳仲尼（左）同太太區海倫（右）坐懷舊電車，暢遊三藩市。 （陳仲尼提供）
  • 陳仲尼（左）同太太區海倫（右）坐懷舊電車，暢遊三藩市。 （陳仲尼提供）

暑假遊美 坐懷舊電車

話明要執正，阿Rock近日喺屋企衣櫃搵番當年結婚嘅燕尾禮服及白煲呔出來，但至今着起來，西褲略為嫌窄，所以正積極瘦身五磅，咁就Fit晒嘞。講番阿Rock一家嘅美國之旅，佢趁旅程之便送大仔Iain及細仔Matthew上暑期班，而佢就同太太區海倫坐懷舊電車，又暢遊LEGOLAND，樂而忘返。

卓妮

Money18免費即秒股票報價網站現推出8升級功能，財經資訊，實時實發！