政情：彤叔捐七位數撐貧童
周大福集團主席鄭裕彤向來善心，捐錢辦學不遺餘力，非洲及內地小朋友嘅未來，都係關注熱點。彤叔尋日帶頭捐七位數字行善，公子鄭家純出力搞慈善晚宴。純官話，真正財富，係幫助有需要人士，將希望帶畀人喎。
純官搞騷 星光熠熠
鑽石貿易商Diamond Trading Company（DTC）尋晚首次喺香港舉行國際慈善晚宴「DIAMONDS IN THE SKY」，冠蓋雲集麗思卡爾頓酒店。純官出馬搞騷，星光熠熠，而彤叔都賞面出席下午記者會，全程笑容滿面。縱橫商界多年，彤叔老友多，DTC都係佢生意夥伴之一，彼此合作無間，對方搞慈善騷，彤叔覺得好有意義，拍心口做主要贊助商。
慈善晚宴上，有拍賣籌款環節，包括周大福贊助嘅名貴鑽飾。善款將撥捐鑽石力量慈善基金會及中華慈善總會，為貧困嘅青年提供助學。彤叔同純官咁善心，下次DTC發現靚鑽石，留番粒巨鑽畀佢哋都抵啦！