政情：選民力量踩上門燒鴿
選民力量矢志要白鴿黨喺嚟緊區議會選舉中票債票償，尋日剛好係佢哋成立一周年，佢哋一行十多人操上白鴿黨總部，正式向白鴿黨下戰書，隨書附送燒乳鴿。不過，被狙擊嘅白鴿黨冇高層到場接信，只係由新總幹事林卓挺頂住，阿挺不甘示弱，出動「司徒華」鎮住場面。
選民力量成員「慢咇」陳志全喺白鴿黨總部樓下，首先用火槍狂燒兩隻生乳鴿造勢，然後連同戰書送上白鴿黨總部。白鴿黨開定大門迎接，選民力量林雨陽就即場宣讀致白鴿黨主席何俊仁嘅挑戰書，聲言如果鐵頭仁肯向選民道歉兼辭職，佢哋就唔會喺區選中狙擊白鴿黨候選人。
林卓挺擺華叔上枱
阿挺就禮尚往來，送出白鴿黨已故元老司徒華嘅《功成必有你在》同一本政治論述書畀選民力量成員，雙方更展開一輪激辯，最後雙方爭持不下，強調一切交由選民決定。
另外，因為好事近而棄選嘅選民力量袁彌明都有現身，佢坦言會以家庭為先，但仍然會抽空幫參選嘅兄弟站台喎。