九一九，搞一搞，淫賤黎九月十九日推出免費派發嘅《爽報》，唔知有冇受到亂咁擇日嘅神棍愚弄，總之就係名副其實搞搞震。
《爽報》點樣搞搞震？呢家嘢好笑咯，首先就係先搞死同一集團嘅《蘋果日報》。試諗諗，如果你手上有一份免費嘅爛果報二號，你會唔會真金白銀走去買一份收錢嘅爛果報一號？傻嘅都唔會啦，嫌錢腥咩，於是咯喎，爛果報一號肯定淪為自己人打自己人嘅犧牲品，未來銷量必然江河日下，跌到趴街嗰隻。
另一個搞搞震嘅對象係已經病到五顏六色嘅地球。喂，淫賤黎嘅目標係每日派出一百萬份《爽報》，要斬幾多棵樹先至足夠製成紙張？大家唔好忘記，免費報嘅下場往往係未曾派發已回收，原封不動當廢紙，呢家嘢咪就係嚴重浪費囉，直接損害自然生態。功夫茶絕對唔介意，環保組織浩浩蕩蕩操去壹淫媒總部抗議。
再講吖，發行量一百萬份隨口噏嘅啫，淫賤黎吹噓二百萬份甚至一千萬份都得，講大話當食生菜都慣㗎啦。亦即係話，如果發行量係實數，等於破壞環保，如果發行量係虛數，等於呃神騙鬼。
至於第三個搞搞震對象，就係整體傳媒生態。一九九五年淫賤黎推出爛果報，帶頭以割喉式減價促銷，已經累到好多小型報館執笠，家陣再推出免費報，肯定又會進一步破壞傳媒生態，話唔定其他小本經營嘅免費報甚至收費報被淘汰。所以話啫，淫賤黎真係好契弟㗎，簡直就係一個無惡不作破壞王。
講到呢度，功夫茶不得不為破壞王加一個註腳，呢一個有破壞冇建設嘅淫賤黎好明顯將會自取滅亡。點解咁講？呢嗱嗱嗱，正常奸商奉行嘅哲學永遠係損人利己，之不過淫賤黎比較犯賤，所作所為往往係損人而不利己。
先睇睇往績，淫賤黎當年推出「蘋果速銷」，結果變成「速速消失」，燒錢十幾億執笠離場，損害咗零售市場而自己毫無得益。再睇睇近況，淫賤黎家陣有四條血管穿咗窿。第一條穿窿血管係台灣壹電視，第二條穿窿血管係互聯網業務，第三條穿窿血管係台灣《爽報》，第四條穿窿血管係香港《爽報》，夾夾埋埋，保守估計年蝕六億。假如爛果報為咗抗跌紙而減價，將成為第五條出血線，到時五條血管齊齊穿窿，神仙都會流血不止而死啦！大家千祈唔好唔記得，《東方日報》同《太陽報》回饋讀者減價，壹淫媒將會腹背受敵。正如全國政協委員劉夢熊話齋，《蘋果日報》正面臨「減又死唔減又死」嘅局面，唔減價隨時跌穿二十萬份，連市場第二位都保唔住。
咁即係話，九一九，搞一搞，淫賤黎搞死人哋，遲早害人終害己！