位於添馬艦嘅新立法會大樓停車場，比舊大樓停車場地方大幾倍，所有議員同首長級秘書處職員都分到一個車位。秘書處早前諮詢議員，問佢哋想每人分配一個固定泊位，定係先到先得鍾意泊邊個位都得，結果大部分議員都選擇自由泊位。
議員揀車位有自由，但無自由霸車位。過往曾經有議員當立會停車場係自己屋企車房或街邊免費泊位，一次過泊幾部車過夜，秘書處尋日就再三警告，搬去新大樓之後，每名議員喺同一時間最多只可以泊一架車。
其實舊立會停車場過往都發生過唔少集體回憶，包括前保安局局長葉劉淑儀座駕畀居權人士圍堵、中總代表黃宜弘喺坐車離開時向反廿三條示威者舉中指、官員座駕被掟狗餅同紙飛機、以及有議員同佢哋嘅司機亂揸車撞花其他議員車輛，甚至撞跌巡邏警員嘅鐵騎等。新大樓停車場設喺室內，示威者好難埋到身，類似事件將成為絕唱。