暑假過去，行政會議今日會喺添馬艦新特首辦復會，新嘅開會場地，兩個疑似特首候選人唐英年同梁振英隨時會宣布辭職，開會都唔慌會專心。行會場外有團體擺明車馬要向唐英年討債，新特首辦肯定有連場好戲上演。
早前盛傳唐唐尋日辭職，但尋日乜都冇發生，佢只係下晝三點幾去咗新特首辦，逗留咗大約一個鐘。梁振英就連續第二日話，就辭職嘅事要同煲呔曾商量。
行會新場地有新嘅請願格局，關注長者權益大聯盟今日同梅窩鄉委會一齊逼埋喺新特首辦外得廿四平方米嘅示威區，兩個團體逼逼吓，話唔定有人會被迫咗落去水池度，咁就真係大吉利是。日落西山嘅弱勢政府面對請願同採訪都會變驚弓鳥，採訪空間會唔會收細亦備受關注，如果因為搬新屋而增加採訪限制，呢個政府就真係不如連行會都唔好開，提早解散好過。
講開選特首，前港區人大代表吳康民話，如果建制派喺選委會階段可以攞到一千個議席，咁建制派有兩人參選，都無問題喎。意思即係話，泛民要參選，都無咁容易漁人得利囉。