政情：白富鴻遞表戰中西區
今屆區議會選舉選情相當激烈，唔少新人加入戰團，其中燕之家創辦人、前菁英會主席白富鴻（Frank）啱啱卸任主席一職之後，決心出戰中西區衛城選區，對撼白鴿黨嘅鄭麗琼。Frank尋日下晝去咗中環海港政府大樓遞表，一班團隊同菁英會主席洪為民、副主席曾鳳珠、副秘書長王嘉恩等一眾兄弟挺身力撐，令到Frank非常感動。
今次Frank毅然參選區議員，原來佢兩年前已經開始喺區內做各類社區工作，幾個月前仲成立咗中西區半山社區事務促進會，為參選區議員鋪路。Frank話希望自己將來唔只可以為中西區服務，仲將佢喺商界多年累積番嚟嘅宏觀概念帶到整個香港社會。唔通想進身立法會超級議席？佢答話，自己剛宣布參選，呢啲係好長遠嘅事。佢仲話，贏輸都係好小事，會盡力而為喎。
講番Frank嘅對手鄭麗琼，本身任職註冊社工，已經喺該區做咗十七年區議員，Frank要贏，都要好努力至得。