政情：進出口界爭位暗箭亂飛
日前我哋寫過「百年老店」香港中華總商會完成世代交接，將會由中生代方文雄接替黃宜弘出選中總立法會議席。不過另一親中商會中華進出口商會，之前盛傳會接棒出選立法會進出口界議席嘅許華傑，最近就疑似大熱倒灶，傳聞中嘅理據居然係阿媽反對！次熱門陳仲尼就更加畀人傳佢將會與同父異母嘅哥哥陳鎮仁爭產，因此亦唔得閒參選。不過兩位當事人都強烈否認有關傳聞，質疑有人喺選舉前亂放暗箭。
現任進出口界立法會議員黃定光（象哥）早喺兩年前講過，做埋今屆就會退下火線，接班人選包括前進出口界立法會議員許長青個仔許華傑，以及前香港青聯主席、現任全國青聯副主席陳仲尼。到今年四月許華傑當選民建聯中委，大家都認定佢已經喺呢場爭奪戰中跑出。豈料早前卻有人傳出，話許華傑媽媽擔心個仔太操勞，反對佢參選立法會。
接班人疑棄選 象哥冧莊？
有知情人士同我哋講，有關傳聞最具殺傷力嘅，唔係話許華傑媽媽真係反對佢參選，而係暗批佢只識靠上一輩嘅關係同影響力爭位。許華傑早前向我哋講，佢咁大個人，對一個咁重要嘅位，點會阿媽話點就點呢？但佢亦承認至今仍未決定係咪參選，話可能仲未係時候喎。
至於有關陳仲尼嘅黑材料就仲離譜，眾所周知佢同現任生產力促進局主席陳鎮仁係同父異母兄弟，有傳佢兩房人將會爆發爭產戰。陳仲尼透過我哋鄭重澄清，第一佢爸爸仍然健在，並早已就家族生意同資產作出分配，根本唔存在任何爭產或分產問題；第二係佢同兄長陳鎮仁關係一直好好，時有傾偈食飯，唔係一般人諗咁樣，兩房人老死不相往來。有關傳聞唔單止係誤傳，直情係惡意抹黑！
不過陳仲尼亦表明暫時無心全身從政，唔會同任何人爭位。兩大接班人選都疑似棄選，相信進出口界個位將會由象哥做多一屆，四年後再爭過。