中環出更：戴德豐大膽起用劉子千
零食大王、四洲集團主席戴德豐早前喺旅港海南同鄉會嘅就職禮上，好慷慨咁贊助全場禮物，當中包括由劉子千灌錄嘅音樂光碟，原來呢隻CD係戴德豐自掏腰包，造咗十萬隻嚟派畀街坊友好。戴德豐如此大手筆，皆因對劉子千呢位新進歌手十分欣賞，認為係娛樂圈中嘅可造之材喎，加上劉子千嘅爸爸係音樂名人劉家昌，同戴德豐分屬老友，戴德豐仲準備搵劉子千為集團旗下嘅咖啡飲品做代言人添。
戴德豐又話，佢一向都樂意起用知名度唔高，又或者初出道嘅藝人嚟充當代言人，因為當呢啲藝人他日聲名鵲起，就覺得自己好有眼光。例如上世紀八十年代嘅周星馳，九十年代嘅容祖兒同埋隨後嘅謝霆鋒，都做過四洲產品代言人。
《唸你》遭瘋傳惡搞
劉子千係一個好有爭議性嘅藝人，單係唱片內收納嘅其中一首歌曲《唸你》，就喺網絡內遭瘋傳，仲惹嚟唔少惡搞嘅作品。用劉子千做代言人，戴德豐都可以話係大膽起用新人嘞。