中環出更：周紹榮揼錢栽培四葉鴨
律師兼菁英會委員周紹榮（Joseph）係城中「鴨癡」，去年喺日本邂逅一隻蛋黃色「四葉鴨」，即時萌生做「鴨爸爸」念頭，計劃將佢引入香港，開枝散葉。
Joseph從事保護商標及版權法，每月總會飛東京、大阪公幹，日本菜係佢「飛佛」，首選香港日本人俱樂部嘅定食，有新鮮魚生、燒銀雪魚及天婦羅，烹調方法正宗。俱樂部採會員制，私隱度高。
斥資六位數創業
日本文化亦令佢着迷。一次機緣遇上《四葉鴨》漫畫作者大鹿先生，一見如故。Joseph不單只從此戒吃鴨，更斥資六位數字捧紅隻鴨，年底將喺香港發行《四葉鴨》漫畫，又會出產Q版毛公仔，首次創業。
為鴨如此瘋狂，朋友都笑佢太天真，太傻。Joseph卻相信直覺：「漫畫中嘅四葉鴨，性格同我好似，好有共鳴。」即使出差去日本，都會用背囊帶隻鴨上飛機。近日又執筆為「四葉鴨」寫小說，講述佢喺香港嘅奇遇。