中環出更：陳幼南就職兩慳「潮」撐環保
潮流講環保，減少廚餘更係大勢所趨。潮州商會會長陳幼南帶頭破格，構思「簡約就職禮」，明年三月就任潮屬社團總會主席時，會奉行「兩慳政策」，就係「慳時間」同「慳食物」，講明九點前就散席，菜單更倣效西餐，精簡至上。
特快晚宴簡約菜式
陳幼南上任會長後，作風一向潮，明年佢擔正做潮屬社團總會主席，人未上任，新構思已源源不絕。佢尋晚出席潮屬各界酒會，自爆有意帶領就職新傳統。佢話一般社團就職禮「前奏」特長，單係致辭、頒發紀念狀，已搞成大半粒鐘，悶到台下嘉賓發慌。
陳智思倡減少廚餘
陳幼南話明年搞騷，一於會來個「快版」：「就職晚宴最好八點半就完，最遲唔過九點。」
講求效率，餸菜當然要精。為免浪費，潮青顧問陳智思大力鼓吹減少廚餘，陳會長聽落極之贊成，拉埋前潮青主任張俊勇（Thomas）齊構思新菜單，初步方案係，倣效西餐咁，頭盤加一至兩味主菜，再加甜品等，總之快靚正。
除咗搞「簡約宴」，Thomas同陳會長仲夾份養馬，據聞醫管局主席胡定旭、長實主席李嘉誠表弟莊學山等猛人都有份。Thomas話，匹團體馬已由新西蘭抵港，呢個馬季亮相。馬名暫定叫「綠豆爽」，係潮州傳統特色甜品。但有「潮人」笑言，綠豆爽往往食到最後先登場，擔心匹馬跑得慢包尾，所以仲未拍板。
卓妮