九月九，重陽節，又係秋祭好時候。今年重陽節係陽曆十月五日，雖然距離正日仲有一段時間，不過家陣已經有孝子賢孫開始掃墓，貪人流冇咁洶湧，唔使逼餐飽吖嘛。
講開掃墓，有兩件事非常之咁激心。第一件事梗係骨灰龕位長期供不應求啦，搞到善男信女求神拜佛希望唔好咁早死，萬一英年早逝，死無葬身之地就該煨咯。至於第二件事咯喎，主要係做官嘅不近人情，嚴格嚟講係「霸道」。
運輸署最近宣布，九月十八日開始至十月底嘅星期六、日以及假期，不准非專線小巴同的士駛入通往柴灣華人永遠墳場嘅連城道，只准專線小巴同巴士行駛。
你知啦，職業司機好多時候依靠大時大節或者春秋二祭搵食，封路措施一來損及司機生計，二來都為孝子賢孫造成不便，唔通你叫佢哋孭住元寶蠟燭香甚至三牲酒禮，大汗疊細汗行路上山咩？身壯力健嘅後生仔女可能冇問題，當係應節嘅登高活動囉，之但係上咗年紀嘅大叔大嬸就麻煩嘞，行到上山隨時氣若游絲。
職業司機就話嘞，今次封路既冇必要又不公平，批評署方事前冇諮詢業界，要求擱置有關措施。的士同小巴司機為咗表達不滿，尋日朝早發揮群眾力量一度堵塞連城道。司機代表仲話呀，同意盡快安排會議磋商，不過如果未能解決問題，不排除星期六再發起堵塞行動。
話時話，掃墓旺季是否真係有必要封路？如果你話禁止私家車駛入某一特定路段，功夫茶唔覺得係大問題，但係的士同小巴好好歹歹都算係公共交通工具吖，運輸署一嘢就針對性封殺，確係好唔公平喎。一意孤行嘅官僚作風萬一激到大批職業司機生蝦咁跳，堵塞行動愈玩愈大，全人類都冇路行㗎咋！
講開又講吖，掃墓旺季固然應該疏導人流，其實特區政府更加有義務疏導「鬼流」。喂，骨灰龕位幾時先至有着落呀？祖先百年歸老幾時先至有陰宅「上樓」呀？
今時今日好多孝子賢孫唔係風風光光去墳場掃墓㗎，而係寒寒酸酸街邊祭祖。事關一龕難求，祖先骨灰迫於無奈暫時寄放於殯儀館，每逢清明或者重陽都要去到「徙置區」探親，而探親嘅地點就係鄰近殯儀館嘅街邊。見到此情此景，簡直覺得做人難，做鬼也難。
所以話啫，唔該官老爺唔好咁不近人情啦，封路措施唔好咁霸道，殯葬事宜唔好咁冷漠，否則香港人做鬼都唔放過你！