政情：李殷泰退休 想做義工
唔知大家仲記唔記得當年經歷「九鐵兵變」嘅主角之一，當年係九鐵運輸高級總監嘅李殷泰（YT，圖），兵變之後，YT○九年調咗去大嶼山做副車務總監，代替張少華做埋「三碌零」話事人個位。轉眼間，李殷泰又到咗退休之年。
身經百戰嘅YT尋日出席「三碌零」五周年慶典。YT話終於可以功成身退享受下生活，過去嘅幾十年，佢擺晒所有時間喺工作上，依家終於可以周圍去玩下。不過問到佢想去邊玩，佢又暫時講唔出，可能仲未決定喇。
YT淨係話，除咗玩之外，仲希望第時做下義工，將自己咁多年做鐵路管理經驗拎嚟同其他團體分享。佢嘅管理經驗又的確好獨特，好值得同後輩分享下嘅。