政情：任亮憲落區 面懵收場
工聯會副會長陳婉嫻日前正式遞交提名表參選黃大仙龍上選區，工聯會即時群星拱照嫻姐去報名，聲勢一時無兩，事先張揚有意狙擊嫻姐嘅「維園阿哥」任亮憲亦不敢怠慢落區收集當區市民提名，希望盡早確立參選人嘅身份，要狙擊都有個名分。但係尋日任亮憲落區收集簽名提名時，竟然失威到畀至少六至七名阿伯圍住，畀人大聲指罵佢搞亂香港同做埋啲衝擊示威。
嫻姐喺黃大仙打滾咗廿年，「維園阿哥」呢個空降部隊根本同嫻姐無得揮，尋日喺區內發生嘅一樁小事，已經日充分講明情況。
「維園阿哥」尋日畀人鬧到面懵懵之際，嫻姐咁啱得咁蹺路過爭取市民支持，見自己嘅「粉絲」圍攻任亮憲，佢好大方為「維園阿哥」解窘，一聲令下叫班阿伯要和平示威同唔好嘈，過多一陣班阿叔就聽聽話話鳥獸散離開。
尋日嘅事證明咗，要成功狙擊嫻姐都唔係咁容易。已經報名參選龍上選區嘅仲有民主黨林偉基。