政情：容永祺挺唐 教徒寸爆
自從行政會議召集人梁振英宣布備選，唔少「挺唐派」都紛紛出言撐政務司司長唐英年參選特首，專資會創會主席容永祺（Samuel）仲話支持唐唐係因為受到神嘅感召。不過Samuel嘅言論就受到一班基督徒質疑，覺得佢擺上帝上枱，有政治目的咁話。尋日Samuel返教會仲畀班不滿佢言論嘅基督徒踩場添。
班基督徒尋日直踩Samuel返嘅教會，因為有其他教友喺度，Samuel為免尷尬就帶佢哋去第二度傾，之後先返教會。班基督徒質問Samuel點解受神嘅感召支持唐唐就講，金融風暴時受到神嘅感召自己放晒啲股票就收收埋埋唔出聲，唔叫埋啲市民拿拿聲散貨，又問佢早前撐西九新動力立法會議員梁美芬係咪都因為蒙神感召，真係句句寸到盡。
Samuel惟有死撐，話因為放股票係佢嘅個人嘅感召，所以嗰陣時冇講，又話自己絕對唔係將上帝擺上枱，就算支持唐唐，都只係佢個人嘅決定咁話喎。