中環出更：劉丹嘆區議員唔易做

劉丹尋日現身沙田馬場，卓妮見到劉丹，問佢仲會唔會參選，劉丹認為做議員最好就係全職投入，若然要兼顧其他事業，就會好唔得閒，尤其是演藝界工作無定時就更辛苦，佢當年試過通宵拍劇，翌日又要去區議會開會，仲有好多大大小小嘅組織活動要出席，真係少啲精力都應付唔嚟。佢話反正自己做咗兩屆區議員，總算體驗過從政嘅滋味，所以今次就算有超級議席，都唔會重拾當年參選嘅熱誠。

同樣有去馬場打氣嘅，仲有立法會議員陳鑑林。對於陳婉嫻退出民建聯，陳鑑林會否因少咗個黨友而覺得可惜呢？陳鑑林就話無問題，因為嫻姐向以工聯會嘅服務為主，各自有唔同嘅分工啫，陳鑑林又話自己亦都係工聯會嘅會員，大家有良好嘅合作關係，可謂你中有我，我中有你。不過合作歸合作，對於工聯會嘅選舉策略，佢就話唔清楚喎。