中環出更：保良籌款騷溫馨洋溢
上周六紅館熱鬧非常，皆因一年一度嘅「星光熠熠耀保良」又舉行。當晚冠蓋雲集，唔少重量級名人都盛裝到會，仲帶埋仔女一齊捧場，好似主席龐盧淑燕與丈夫龐國本同囝囝龐維新夫婦、副主席梁安琪及長子何猷亨和女友Sabrina、總理陳正欣伉儷同囡囡陳柏錡等都有嚟捧場，令個show親情洋溢，格外溫馨。
副主席兼活動籌委會主席鄭錦鐘（Eric）有太太與囝囝鄭泳舜夫婦一家大細瞓身支持，認真sweet。Eric同卓妮講，為咗個show都無咩點瞓，朝早起身竟然發現下巴生暗瘡，真係「青春」。卓妮問佢預料會籌到幾多善款，佢好謙虛咁話保持過往紀錄就夠。至於今年個show嘅節目，Eric話主要畀番藝人同流行歌手揸旗，主席同總理會留番周年慶典先會大展身手喎。
陳細潔中性打扮現身
冠名贊助今次個show嘅總理朱李月華同老公朱沃裕帶埋囝囝同女友一齊睇show，問囝囝幾時同女友拉埋天窗？朱生笑住咁答，仲係女朋友啫，邊有咁快呀？總理蔡李惠莉同老公蔡志明手翹手恩愛出現，全身紫色嘅蔡太好搶鏡，蔡生則由蔡太做形象顧問，煲呔同西裝都經過精挑細選。蔡太話，上次周年慶典唱歌籌款，覺得自己唱得麻麻，所以今次唔開金口，但會身體力行，同先生一齊參與大會嘅遊戲籌款環節。
總理陳細潔以一身中性嘅破格打扮出現，佢話年年都打扮得咁女性化，今年想特別啲喎。卓妮問單身嘅佢最近忙啲咩，佢話公司同做善事都忙，有追求者都冇時間拍拖，不過佢話，寧缺勿濫，唔會心急喎。咁又係，後生靚女又有事業，使乜怕冇對象喎。
卓妮