嘩嘩嘩！將乘客半天吊竟然唔係昂坪纜車嘅獨家強項，海洋公園原來都有呢家嘢招呼朋友。好衰唔衰，海洋公園企圖死瞞爛瞞，出事之後居然冇公告天下。如果唔係有當事人踢爆，半天吊事件或者就會好似內地維權人士咁樣「被失蹤」。
件事係咁嘅，上星期六喎，位於山上「海洋摩天塔」嘅旋轉觀光艙，喺離地二十米位置突然停咗，五十四位遊客被迫吊吊揈超過半小時，後來要經過內置樓梯先至可以離開。
原本冇人知o架，事關海洋公園玩神秘粒聲唔出。不過親歷其境嘅受害者條氣唔順，一怒之下玩踢爆，咁至大白於天下。
不認不認還須認，海洋公園發言人就話嘞，上星期六海洋摩天塔確係因為安全系統啟動，離地約二十米停止運作，經檢查後發現原因係當時遊客側向一邊，令安全系統感應到觀光艙輕微傾斜，自行啟動安全鎖。發言人又話，呢一次係海洋摩天塔啟用十九年以來，第二次發生同類事故，上次係一九九五年。
咦，咪住先，海洋公園之前都有機動遊戲出事喎，事後又係冇向外公布。九月十一日，「越礦飛車」發生列車追撞事故，載有二十三名乘客嘅列車埋站之時，其中一組煞車裝置故障，低速撞向站內空車。好彩冇人受傷咋，否則事發當日適逢九一一，人哋以為恐怖襲擊都有之。
點解一而再出事，海洋公園都係秘而不宣嘅呢？莫非公眾知情權經過「港產公安」一連串粗暴踐踏之後，已經變得可有可無？嗱，你唔好同功夫茶講，海洋公園學似香港大學咁，已經被警方列為滴水不漏嘅戒嚴區，所以必須封鎖消息呀，熱愛自由嘅香港人嬲o架！
唉，講真吖，「紙包雞」就話有可能啫，你幾時見過「紙包火」？既然紙包唔住火，任何企圖隱瞞真相嘅所作所為，最終一定會失敗。冇錯，「香港公安部部長」曾偉雄之流嘗試將記者貶為一團黑影，之但係香港嘅新聞自由好好歹歹都仲未壽終正寢，一旦有人向傳媒揭發，咁咪乜都穿煲囉，傻仔！
計功夫茶話齋，海洋公園絕對冇必要沾染官老爺黑箱作業嘅陋習，增加透明度實在係應有之義。你知啦，但凡涉及安全問題，市民係有權利知道真相嘅。譬如溫州高鐵炒車，乘客知道之後起碼可以改搭飛機吖嘛。
點都好啦，麻煩海洋公園醒醒定定，當務之急係做好安全檢查，確保唔會再出事。其次咯喎，事不宜遲，馬上戒絕凡事隱瞞嘅陋習，千祈唔好助紂為虐剝削公眾知情權！