政情：難推慈善法 政府攞嚟衰
政府弱勢失民心，施政梗係舉步維艱。法改委之前建議成立一個獨立監管機構規管慈善組織，即時引嚟大批團體嘅反對。陳智思身為法改委轄下嘅慈善組織小組委員會主席，睇見咁多團體堅決「說不」，就話市民對政府嘅信任度低，所以對佢委任嘅監管機構亦無晒信心！陳智思今次擺明將話說在前頭，就係搞唔掂慈善法，係政府問題，唔係佢無料到。
陳智思話其實個建議係七人小組委員會嘅建議，根本唔係政府嘅立場，要諮詢完先交正式建議畀法改委，到真係立法都仲有排，暗示大家唔使驚定先。
陳智思自己其實好清楚啲團體驚乜，就係將來委員會權力過大，會變成將來政府進行政治打壓嘅工具。佢話大家可以趁諮詢畀多啲意見，定清楚「慈善」嘅定義。總之個建議生不逢時，怪得邊個？