特首選舉愈炒愈熱，部分疑似候選人陣營嘅支持者先後公開放話，目的好簡單，咪就係想逼退其他疑似候選人囉。前港區人大代表吳康民（康叔）都話，為防兩雄相爭，漁人得利，中央勸退一人嘅機會較大。不過，佢話唐英年同梁振英兩個疑似候選人都咁勁，如果要勸退其中一人就要早啲，依家先至勸退覺得有懷疑喎。
康叔尋日出席一個酒會時話，若中央要勸退疑似特首候選人就應該早啲，又叫大家留意佢喺本報嘅專欄《以文會友》，會作詳細交代。
康叔喺專欄中話，中南海高層唔會咁快就特首人選問題向某些「靈通人士」放風，又話中央勸退其中一人嘅可能性較大，又認為被勸退者不敢不退。佢又話，如果參選前就勸退某人，就等同宣布熱門人選競逐嘅高潮結束，選舉日就全無睇頭。
康叔似乎睇透形勢，事關一向對外宣稱立場未定嘅工聯會會長鄭耀棠，尋日突然大膽估計中央政府唔希望建制派多過一個候選人，因為咁樣安全系數最高咁話。而擺明屬於疑似候選人政務司司長唐英年陣營嘅廠商會立法會議員林大輝亦同棠哥不謀而合，話如果有疑似候選人跑跑吓，但最終得唔到足夠支持，應該考慮顧全大局，唔好夾硬落場，以免傷害彼此感情同關係喎。
棠哥同大輝先後放話，明眼人一睇就知佢哋想勸退另一疑似候選人梁振英（CY），唔通佢哋想唐唐喺冇風險下當選？