政情：梁栢賢諗計架空周一嶽
特首選舉形勢逐漸明朗化，各疑似特首候選人嘅支持者亦浮出水面撐場，好似盛傳將出任政務司司長唐英年（唐唐）競選辦主任嘅胡定旭（肥胡），前日已公開表明心迹。政圈近日更漏出風聲，指身兼醫院管理局主席嘅胡定旭滿腹醫療大計，近排仲拉埋佢嘅好兄弟醫管局行政總裁梁栢賢（ＰＹ）一齊出謀獻策，完全係架空食物及衞生局局長周一嶽，話唔定ＰＹ喺下屆政府取代周一鑊做局長都未定。
眾所周知，本港醫療最大問題係公私營失衡，優質私家醫院服務只係有錢人嘅專利，貧苦大眾就要喺公立醫院排長龍，周一鑊提出「自願醫保」就係想氹市民買保險轉用私家服務，但已經有唔少人質疑佢呢條屎橋行唔通，因為私家醫院利字當頭，政府根本就控制唔到佢哋收幾多錢，如果單靠自願醫保，市民隨時要倒貼一大筆錢先埋到私院張帳單，等於搵市民笨。
隨時做下屆局長
消息人士話，肥胡同ＰＹ就諗過開闢「第三條道路」嘅可能性，由政府成立「醫療發展局」，專責協助慈善團體或非政府機構搞「社企醫院」，以近似私家醫院模式營運，主要針對有買醫療保險，同時又想享用較好醫療服務嘅中產一族，收費方面當然唔及醫管局咁平啦，但亦唔會好似私家醫院咁「海鮮價」。據講如果呢啲社企醫院賺到錢，就將部分盈利投放番落去提升公營醫療服務。
雖然有意見擔心計劃等同搶私家醫生飯碗，但其實依家好多私家醫生都要睇私院面色，先至攞到病床，如果日後多幾間「社企醫院」畀佢哋揀，一家便宜兩家着，相信佢哋都唔會太抗拒。雖然肥胡同ＰＹ呢個大計暫時只係紙上談兵，但現任局長周一鑊係咪知情呢？分分鐘被人架空咗仍蒙在鼓裏都未定。話時話，佢哋呢個大計可能喺下屆政府大派用場，而ＰＹ分分鐘有資格取代周一鑊做局長都未定。