中環出更：郭老太難捨翡翠吊墜
愛美係女人嘅天性，任何年齡嘅女士都唔例外。卓妮尋日喺中環見到新鴻基地產主席郭鄺肖卿「微服出巡」，心情勁靚嘅佢身穿深紫色套裝配啡色間條絲巾，精神奕奕地由一名女友人及外籍保鏢陪同行街。郭老太行到去皇后大道中四十四至四十六號間周大福珠寶金行嘅時候，一眼就睇中咗飾櫃內最大粒嘅玉石吊墜，急不及待要入去鑑賞一下。
本想離開 返轉頭再睇
一向鍾愛玉石鑽飾嘅郭老太眼光果然獨到，個吊墜係由幾百粒鑽石包住龍眼咁大粒嘅翡翠鑲嵌而成，耀眼度十足，大方又得體，啱晒佢雍容華貴嘅形象。郭老太似乎愈睇愈鍾意，足足拎住個吊墜研究咗十幾分鐘先肯放低。但卓妮見佢欲行出店舖離開之際，又忽然急急腳走番入周大福再睇過，冇耐店舖職員仲閂埋道玻璃門等佢專心慢慢睇添。
卓妮原本想問吓郭老太買咗乜嘢好嘢，順便問問佢點睇特首選舉，點知等候咗一段時間都未見佢行出店舖門口，反而見佢個外籍保鏢做先頭部隊出嚟探路，最後郭老太由另一條通道離開。
卓妮