中環出更：林超英冧太太 陪行街撐枱腳
前天文台台長林超英退休後嘅生活好悠閒，不時到野外遊山玩水，又抽時間去大學教書，而且仲多咗時間陪太太行街培養夫妻感情添。卓妮日前傍晚行過中環ifc時，就見到林超英兩公婆喺ASIANTWIST餐廳內溫馨撐枱腳，見佢哋邊食飯邊有講有笑，唔知係咪傾緊遲啲去邊度旅行呢？
食飽飽後，佢哋兩公婆就逛商場散步幫助消化，又去咗珠寶店睇下鑽飾，真係hea到暈。跟住佢哋仲拍拖入Palace戲院睇戲，林太小鳥依人咁翹住林生隻手，鬼咁恩愛，羨煞旁人。期間林超英見到太太頭髮亂咗，即刻從後幫太太整理好，咁體貼，冧到林太不知幾開心。
身體力行挺環保
林超英好快就發現咗卓妮嘅蹤影，卓妮於是上前打招呼傾幾句，問佢平時點樣將環保實踐係生活上面？佢就話：「最緊要唔好浪費食物，食幾多叫幾多，咁就食得開心又環保。」唔單止咁，佢仲身體力行，唔開私家車改坐港鐵。對天文氣象瞭如指掌嘅佢，果然深明愛惜地球嘅重要性，將環保融入日常生活，確係值得嘉許。
卓妮