政情：杏林名花天生明星相
醫管局新界東聯網尋日開記者會，介紹急性缺血性中風後嘅治療計劃，總監馮康都在場，令人眼前一亮嘅，係在座有一位靚女醫生，佢就係威爾斯親王醫院腦神經科副顧問醫生蘇靄欣（Yannie）嘞。病人見到靚醫生，唔知會唔會康復得快啲呢？
驟眼睇，Yannie有幾分似名模Amanda S，同樣擁有瓜子臉、大眼睛。明查暗訪下，原來Yannie二○○○年畢業於中大醫學院，七年後再取得腦神經科專科醫生資格，稱得上係「醫界名花」，佢年齡若干，大家都心中有數喇。Yannie名花有主，老公都係醫生，襯到極。
Yannie份人陰聲細氣，夠晒細心，尋日聽見病人親述病情時流晒眼淚，佢溫柔地遞上紙巾慰問。佢身邊嘅人仲話，Yannie對衣着打扮講究，平日返工化妝一絲不苟，令同事同佢共事，心情都愉快啲。