餐館霸路 食署有法不執
食肆肆無忌憚於行人路經營，煙蒂及食物渣滓散滿一地，食物環境衞生署被指有法不執！深水埗居民張小姐指，桂林街長期有食肆霸佔行人路營業，多次向食環署投訴均不獲處理，「每晚六、七點就擺晒啲枱出嚟，霸足半條行人路，食環署咁都唔執法，係咪默認佢哋咁做？」
食環署發言人承認上址有食肆非法擴展營業範圍，已向有關負責人作出檢控，並促清潔服務承辦商加強服務。連同上述檢控，由去年九月至今，當局對上址一帶食肆作出七宗違例檢控。
深水埗區區議員黃志勇直斥部門執法不力，「只係對食肆發告票嘅刑罰好輕，張告票其實佔食肆嘅盈利好少部分，所以無論佢哋被檢控幾多次都會繼續霸佔行人路做生意！」黃促食環署提高罰則，並加強檢控以減低當區食肆阻街情況。