百物騰貴，油魔肆虐，家陣養一架車代步都幾頭痕，每個月油費加雜費隨時一萬幾千銀。功夫茶身邊好多朋友都有諗過轉用節約能源電動車，一來環保，二來響應呼籲餓死油魔嘛。可惜吖，諗還諗，始終未付諸實行，基本上可以歸納為三大原因——
「唓，電動車咁貴，點買得起呀！」
「喂，充電站咁少，點樣充電呀！」
「頂，電動車未必准駛上快速公路喎，搵笨咩！」
呢嗱嗱嗱，唔單止功夫茶嘅朋友有咁嘅煩惱，事實上全港不少市民都遇上類似問題。根據「東方報業民意調查」顯示，對於油價加快減慢，三成五受訪者批評政府以自由市場為藉口坐視不理；兩成七不滿政府束手無策；兩成三形容油價完全失控，任得油公司擺布。
如果你唔想受到油魔折磨，電動車無疑係另一選擇。之不過咁，實際上現時全港只有大約一百七十架電動車，比例上絕對係勢孤力弱嘅少數民族。點解電動車仍然無法普及？三成七受訪者就覺得，政府推廣不力，令電動車未能普及；兩成九批評進展緩慢；一成九不滿充電設備不足。
立法會議員陳克勤講得啱㗎，政府處理油價加快減慢問題畏首畏尾，電動車又乜都做唔到。陳議員又批評政府對於電動車提供稅務優惠少，難以吸引市民轉用。
莫講話私家車少有人轉用電動車吖，排放廢氣嚴重得多嘅大型巴士更加係原地踏步，環境局做過乜呢？唔好意思，真係睇唔到囉，淨係睇到財爺曾俊華亂咁報料，話九巴公司打算「租用」電動巴士測試，實際上係九巴公司同比亞迪合作，同租用完全無關。
本地薑研製電動車其實都有一手㗎，好似理工大學咁吖，將成果同外國企業合作大放異彩。咦咦咦，點解本地薑要同外國企業合作而唔係明益香港，從而改善空氣污染？關於呢一個問題，真係要請教各位環保大官僚，可能政府崇洋啩，硬係覺得外國月亮特別圓，港產電動車係靠唔住嘅，所以咪「華人與車」不獲重視囉！
即係咁，推廣電動車同其他環保措施一樣，空有姿勢，全無實際。如果你希望自食其力，連電動車都唔用嘞，一於踩單車代步，功夫茶勸你三思而後行，事關政府更加漠視單車，搞到單車奪命事故層出不窮。
講到尾都係懶官僚害人不淺，一來放任油魔為禍人間，二來推廣電動車毫無誠意。功夫茶建議，下一個民意調查嘅題目可以係：環境局局長邱騰華是否應該引咎辭職？