政情：沈祖堯Rap歌中大慶佳節
今日先至係中秋佳節，不過香港中文大學校長沈祖堯早兩日就已經同一班中大同事搞聯歡。當日嘅活動有魔術表演、搓湯圓遊戲，仲有中大歌王扮溫拿五虎唱懷舊金曲。一向親民、前衞嘅沈校長仲同表演嘉賓D-Crew一齊Rap歌（唱饒舌歌），全場個個即刻熱血沸騰。查實中大之前都冇中秋聯歡呢個傳統，係沈校長出任之後，大家先至打成一片。
中大日前喺崇基眾志堂搞咗個中秋聯歡會，沈校長同成班中大職員都玩得好開心。當晚五位中大歌王着住七十年代嘅服裝，仲唱咗溫拿五虎嘅首本名曲「L.O.V.E」同「陪着她」，全場為之哄動。而沈校長亦同D-Crew一齊Rap歌︰「追求卓越，中大本色；傳統現代，中西合璧」，真係字字鏗鏘。
查實中大以前都冇同職員搞中秋聯歡嘅傳統，係沈校長出任之後，先至同班同事打成一片，今年已經係佢哋第二年搞中秋聯歡㗎喇。沈校長識得與眾同樂，唔怪得咁得大家歡心啦。