政情：街工唔埋堆新工黨受挫
打算喺區議會選舉完結後大展拳腳嘅新工黨，未開始已遇挫折。街工會員大會尋日一致通過，唔會加入新工黨，而梁耀忠都唔可以以個人身份加入。阿忠話街工仲發展緊，唔想入咗工黨後搞到街工兩頭唔到岸。知情人士話街工唔肯加入新工黨，死因係唔想聽晒新工黨話事，放棄街工呢支旗幟。
新工黨近排挖人入黨，職工盟李卓人仲諗住靠新工黨發圍，勢估唔到街工已經打退堂鼓。尋日街工會員大會否決加入工黨嘅動議，講明現階段先着重街工發展。阿忠話，估唔到連自己獨立加入新工黨嘅動議，尋日都被會員否決。
阿忠扎根葵涌區廿幾年，有唔少勞工票，依家工黨無咗阿忠，實力大大削減。知情人士話，街工拒絕入黨，係因為好多街工會員唔想自動過戶到新工黨，認為無工黨撐腰，選舉都唔會有問題，所以一動不如一靜，睇定啲至算。至於區議會選舉，街工決定派出六人出選，當中五人駐守葵涌區老巢，一人空降到天水圍。