中環出更：施榮忻愛駒 搶頭啖湯
鑼聲敲響，馬季開鑼。開鑼日，丁財兩旺，投注額較去年開鑼日高。百仁基金主席施榮忻（Jaime）飲頭啖湯，愛駒「愛拚者勝」贏頭馬，獎金近三十萬元。Jaime話，今日喺中環擺中秋宴，同家人慶祝。
抖暑多時，馬場尋日人山人海。Jaime就同太太、爸爸施子清及大哥施榮怡等親友入場打氣，結果不負所望，袋巨額獎金。Jaime落注各一千元買獨贏及位置，袋多逾萬元彩金。施家同楊孫西、盧文端係福建幫頭領，施楊盧三家係世交，又同屬福建人，中秋例必聚首一堂。Jaime話，贏咗馬，梗係要擦餐勁。
仁濟主席李文斌（Edmond）尋日亦現身馬場，佢專程嚟撐老友場。佳節當前，佢會同爸媽食飯賞月，Edmond家有喜事，二哥李文恩十月結婚，呢排全家出動籌備婚事，喜氣洋洋。同場仲有唔少父子兵，馬會大董周永健就同公子齊敲銅鑼，表現鬼馬。